झेंडा ही गोष्ट आहे महाराष्ट्रातल्या आजच्या तरुणाची! आजचा तरुण हा जितका हुशार, टेक्नोसॅव्ही आहे तितकाच संवेदनशीलही. मग तो मुंबई पुण्यासारख्या मोठ्या शहरातला असो की विदर्भ, मराठवाड्यातल्या लहानशा खेड्यातला! समाजातल्या प्रत्येक घटनेवर, प्रत्येक चढाउतरावर तो त्याच्या पध्दतीने रिऍक्ट होत असतो. लहानातल्या लहान घटनेची नोंद त्याच्या कोवळ्या मनावर होत असते. या अशाच वेगवेगळ्या सामाजिक आणि आर्थिक स्तरातल्या तरुणाईचं प्रतिनिधित्व करणारे चार नायक आदित्य महाजन, उमेश जगताप, संतोष शिंदे आणि अविनाश मोहिते यांच्याभोवती या चित्रपटाची कथा गुंफ़ली आहे...

यातल्या प्रत्येक नायकाची स्वप्नं वेगळी आणि प्रत्येकाच्या आयुष्याबद्दलच्या संकल्पनाही वेगळ्या आहेत! एकमेकांशी अर्थाअर्थी संबंध नसलेल्या या चौघांच्याही आयुष्यात एक समान दुवा आहे आणि तो म्हणजे राजकारण! खरतर भारतातल्या इतर राज्यांपेक्षा प्रगतीपथावर असलेल्या महाराष्ट्र राज्याचं राजकारण हा एक वेगळाच विषय आहे. आपला प्रत्यक्ष संबंध असो वा नसो, राजकारण आणि त्यात होणा-या बदलांचा आपणा सामान्य माणसांच्या आयुष्यावर प्रत्यक्ष किंवा अप्रत्यक्ष परिणाम होत असतो. महाराष्ट्राच्या सध्याच्या राजकारणात घडलेल्या एका मोठ्या घटनेचा या चार नायकांवर झालेला परिणाम आणि त्या घटनेचे या चौघांच्याही जीवनात उमटलेले पडसाद, बदललेल्या परिस्थीतीमधून बदलत गेलेली स्वप्नं आणि त्यांच्या आयुष्यात आलेली स्थित्यंतर या सगळ्याचं प्रतिबिंब म्हणजेच .. झेंडा!

आपल्या सर्वांच्याच परिचयाचा असणारा संगीतकार अवधूत गुप्ते या चित्रपटाद्वारे प्रथमच चित्रपट निर्मिती आणि दिग्दर्शन या दोन्ही क्षेत्रात प्रवेश करतोय आणि तसं करणारा तो मराठीतला पहिलाच संगीतकार ठरलाय. त्यातही या नवीन वळणावर,त्याने पदार्पणातच निवडलेला विषय हा खूप धाडसी समजला जातोय किंबहुना या विषयामुळेच अनेकांच्या मनात चित्रपट पहाण्याची उत्सुकता ताणली जातेय यातही वाद नाही!

या चित्रपटाचं आणखी एक वैशिष्ट्य म्हणजे सारेगमप मधल्या डेंजर झोनचा संस्थापक म्हणून एकेकाळी प्रसिद्ध झालेल्या आळंदीच्या ज्ञानेश्वर मेश्राम याने गायलेल चित्रपटाचं टायटल ट्रॅक,  विठ्ठला, कोणता झेंडा घेऊ हाती!

जगण्याच्या वारीत मिळेना वाट
साचले मोहाचे धुके घनदाट
आपली माणसं, आपलीच नाती
तरी कळपाची, मेंढरास भिती!
विठ्ठला, कोणता झेंडा घेऊ हाती?

हे अरविंद जगताप यांचे शब्द आणि अवधूतच संगीत आणि ज्ञानेश्वर मेश्रामची आर्त साद टायटल ट्रॅकामध्ये खासच परिणाम साधून जातेय! याव्यतिरीक्त अवधूत गुप्ते हा रॉक संगीताचा फ़ॅन आहे संगीत हे ही सर्वज्ञात आहेच. मध्यंतरी सारेगमप मध्ये, "मला मराठीमध्ये रॉक संगीत आणायचं आहे" असंही त्याने म्हटलं होतं,किंबहुना त्याची झलक आपल्याला त्यापूर्वीच प्रदर्शीत झालेल्या सनई चौघडे मधील कांदेपोहे या गाण्याने दिलीही होती आणि आता या ही चित्रपटात तो "सावधान सावधान, वणवा पेट घेत आहे" हे अजून एक रॉक गाणं घेऊन तो आपल्यासमोर आलाय .

स्वप्नील बांदोडकर आणि अवधूतने गायलेलं हे गाणंदेखील खासच जमून आलय आणि तरुणाईला चित्रपटाकडे खेचण्यासाठी ते एक प्रमुख आकर्षण ठरलय! म्हणूनच या गाण्याच्या आणि/किंवा एकंदरीच चित्रपटाच्या निमित्ताने आजकल अवधूत रॉक्स असं म्हटल्यास ते फ़ारसं वावगं ठरू नये! :-)